Италија остана без својот најстар маж. Витантонио Ловало почина на 112-годишна возраст, а веста за неговото заминување ја објавија италијанските медиуми.
Ловало поголемиот дел од својот живот го поминал во јужниот дел на Италија, каде што бил познат како овчар и земјоделец. И покрај тоа што доживеал повеќе од еден век, никогаш целосно не се откажал од работата на земјата.
Живеел во малото место Авилијанија, во покраината Потенца, а последниот роденден го прославил на 25 март.
Со земјоделство почнал да се занимава уште на 16 години, кога работата на земјата била неопходна за да му помогне на семејството. Тој продолжил да го обработува земјиштето со децении, а со работа престанал дури пред шест години, кога веќе имал повеќе од еден век.
Неговиот живот го одбележале и големите историски настани од 20 век. За време на Втората светска војна бил мобилизиран, а во еден период бил заробен од германските сили.
По заробувањето бил депортиран на островот Родос, каде што останал во заробеништво до 27 ноември 1943 година.
Своите спомени од воените години Ловало ги запишал во лични белешки. Подоцна тие записи им ги оставил на своите внуци и правнуци, како сведоштво за неговите искуства од војната и времето поминато на фронтот.
Неговата долговечност била потврдена и на меѓународно ниво. Според организацијата „LongeviQuest“, Ловало се најде на 45-тото место на глобалната листа на луѓе кои достигнале 112 години и 170 дена живот.
Зад себе остави животен пат долг повеќе од 112 години, исполнет со работа, историски пресврти и спомени што ги пренел на следните генерации.
