Музичкиот свет остана без уште едно добро познато име. На 67-годишна возраст почина Синиша Џавиќ, истакнат хармоникаш и музичар, кој со децении беше дел од естрадата и соработуваше со голем број познати имиња.
Џавиќ починал по долго и тешко боледување, а веста за неговата смрт предизвика бројни реакции меѓу неговите колеги, пријатели и соработници, кои преку социјалните мрежи се простуваат од него.
Меѓу првите кои се огласија беше пејачот Александар Аца Илиќ. Двајцата биле долгогодишни пријатели и соработници, а нивното заедничко музичко патување започнало уште во 1986 година, кога заедно заминале во Австралија.
Илиќ се прости од својот пријател со емотивна порака, потсетувајќи на годините што ги поминале заедно, како и на нивните настапи и средби во Австралија. Тој открил и дека Џавиќ своите последни моменти ги поминал во Србија, опкружен со најблиските.
Џавиќ потекнувал од Мачва, а љубовта кон хармониката ја открил уште во детството. Со текот на годините изградил богата кариера и се стекнал со репутација на исклучително ценет инструменталист.
Особено значаен дел од неговата кариера била работата како водечки хармоникаш во оркестарот на Жарко Јосиповиќ Шкула. Со овој оркестар настапувал во различни делови од светот, рамо до рамо со големи имиња на народната музика, меѓу кои Предраг Живковиќ Тозовац и Лепа Лукиќ.
Во текот на долгогодишната кариера, Џавиќ соработувал со бројни естрадни уметници. Меѓу позначајните се издвојуваат долгогодишните соработки со Милош Бојаниќ и Митро Мириќ.
Неговиот талент, сепак, не бил ограничен само на сценските настапи. Џавиќ бил активен и како студиски музичар, композитор и аранжер, а токму поради неговото музичко знаење и професионализам во естрадните кругови го нарекувале „маестро“.
Последните 17 години од животот ги поминал во Австралија, каде што продолжил да живее и работи. И покрај тоа, останал силно поврзан со својот роден крај и со музиката од која потекнувал.
Доказ за тоа е и неговата последна музичка активност. Во мај годинава Џавиќ го објавил синглот „Мачванско слатко“, кој го снимил заедно со Синиша Туфегџиќ.
Неговото заминување остави празнина меѓу музичарите и пријателите со кои соработувал низ децениите, а неговото име ќе остане запаметено по долгогодишниот придонес кон народната музика.
