Фотографијата направена по апсењето на 35-годишна жена од Минесота предизвика огромно внимание на социјалните мрежи, откако корисниците забележале впечатлива сличност со познатата пејачка и актерка Џенифер Лопез.
Сирена Ен Кваст од Сент Клауд била уапсена на 30 август во Монтесело, Минесота, поради сомнение дека од продавница украла два пакета со по две батерии наменети за електрични алати. Вкупната вредност на украдените производи била околу 580 долари.
Според кривичната пријава, вработен во продавницата ја препознал Кваст како лице кое, наводно, било поврзано и со кражба што се случила два дена претходно. Тој потоа ја известил полицијата.
Кваст, наводно, признала дека ги земала батериите, по што била обвинета за кражба од категоријата „gross misdemeanor“, односно посериозен прекршок според законите на Минесота.
Од притвор била ослободена следниот ден.
Сепак, нејзиниот случај набрзо почнал да се шири на интернет поради нешто сосема друго. На фотографијата направена при апсењето, Кваст неверојатно потсетува на Џенифер Лопез.
Сличноста била толку впечатлива што дел од корисниците на социјалните мрежи на прв поглед помислиле дека станува збор за самата 57-годишна пејачка.
Фотографијата предизвикала бројни коментари и шеги, а дел од корисниците се пошегувале и со познатите песни на Лопез. Еден од коментарите се повикал на нејзиниот хит „Jenny from the Block“, додека други се фокусирале на необичната физичка сличност меѓу двете жени.
Според американските медиуми, Кваст и во минатото имала повеќе контакти со органите на редот. Во нејзината историја се наведуваат случаи поврзани со поседување дрога, возење во пијана состојба, бегство од полицијата, давање лажни податоци, како и различни сообраќајни прекршоци.
И покрај огромното внимание што го привлече фотографијата, Џенифер Лопез досега не се огласила јавно за својата неочекувана „двојничка“ од Минесота.
