Пентагонот официјално ѝ даде зелено светло на Белата куќа за испорака на крстосувачки ракети „Томахавк“ со долг дострел во Украина. Одлуката е донесена по детална проценка дека тоа нема да го загрози снабдувањето на САД, оставајќи ја конечната политичка одлука на претседателот Доналд Трамп, откриваат тројца американски и европски функционери блиски до случајот, јавува CNN.
На почетокот на месецот, за време на работен ручек во Белата куќа, Трамп му рече на украинскиот претседател Володимир Зеленски дека би сакал да ги задржи ракетите, истакнувајќи дека „не сакаме да ги дадеме работите што ни се потребни за одбрана на нашата земја“.
Здружениот штаб на американските вооружени сили ја известил Белата куќа за својата проценка неколку недели пред состанокот Трамп-Зеленски. Зеленски инсистирал на испорака на „Томахавк“ за да може поефикасно да ги погодува нафтените и енергетските цели длабоко во Русија. За потсетување, „Томахавк“ има дострел од околу 1.000 милји (приближно 1.600 км).
Проценката од Пентагон ги развесели сојузниците на САД во Европа, кои сметаат дека сега Трамп има помалку аргументи за да ја одбие испораката, изјавуваат двајца европски функционери. Неколку дена пред состанокот, Трамп истакнал дека САД имаат „многу томахавки“ кои би можеле да ѝ бидат доставени на Украина.
Меѓутоа, на истиот ручек, Трамп во својот воведен говор рече дека САД „им требаат“ томахавки, а зад затворени врати повторно му рече на Зеленски дека, засега, нема да ги испорача.
Одлуката следела еден ден по телефонскиот разговор меѓу Трамп и рускиот претседател Владимир Путин. Путин предупредил дека „Томахавк“ би можеле да погодат големи градови како Москва и Санкт Петербург, дека нивното користење нема значително да влијае врз бојното поле, но дека би ги нарушило односите меѓу САД и Русија, извести CNN.
Белата куќа и Пентагон не коментирале официјално.
Извори тврдат дека Трамп не ја исклучил можноста за испорака на ракетите, а администрацијата има планови за брза испорака доколку претседателот одлучи така.
Неодамна, незадоволен од одбивањето на Путин за посериозни мировни преговори, Трамп минатата недела одобри нови санкции кон руските нафтени компании и засега ја одложи планираната средба со Путин во Будимпешта.
Иако Пентагон не гледа ризик за своите залихи, американските одбранбени претставници сè уште анализираат како Украина би ги обучила екипажите и како би ги распореди ракетите. Постојат оперативни предизвици што треба да се решат за ефикасна употреба на „Томахавк“.
Главното прашање е како Украина би ги лансирала ракетите. „Томахавк“ најчесто се лансираат од бродови или подморници, но украинската морнарица е значително ослабена, па лансирање од копно изгледа најверојатно. Американската армија веќе разви копнени лансери кои би можеле да се испратат во Украина.
Дури и ако САД не обезбедат лансери, европските претставници веруваат дека Украина би можела да најде решение. Украинските инженери веќе успеале да адаптираат британски ракети „Сторм Шедоу“ за употреба на постари советски авиони.
Претседателот Зеленски претходно објави дека Украина сака да ги прошири капацитетите за долг дострел до крајот на годината, со цел завршување на војната „под пофер услови“. „Глобалните санкции и нашата прецизност се практично усогласени за да се заврши оваа војна под фер услови за Украина“, рече тој.
„Сите цели за длабок удар мора да бидат целосно обезбедени до крајот на годината, вклучително и проширувањето на нашиот долг дострел“, додаде Зеленски, пренесува CNN.
Не дознавај последен- читај ПРВ.мк
