Уругвај стана првата земја во Латинска Америка што донесе закон за легализација на евтаназијата, откако Сенатот го изгласа законот со 20 гласови „за“ од вкупно 31 сенатор. Претходно, истиот закон беше одобрен и од Долниот дом во август.
Со оваа одлука, Уругвај е првата претежно католичка земја во регионот што го регулира правото на асистирана смрт преку парламентот. Досега, слична практика беше дозволена само во Колумбија и Еквадор, но преку одлуки на судовите, а не со законски акт.
Сенаторката Констанца Мореира изјави дека со усвојувањето на овој закон, Уругвај повторно е предводник во борбата за човекови права, нагласувајќи дека мерката „ја признава слободата на избор до самиот крај – со достоинство и слобода“.
И другите сенатори ја поздравија одлуката како „историска“ и како потврда на посветеноста на земјата на човечкото достоинство и индивидуалната слобода.
Со ова, Уругвај им се приклучи на неколку земји во светот што имаат јасна законска рамка за евтаназија, меѓу кои се Холандија, Шпанија, Канада и неколку држави во Австралија.
