Литванскиот министер за одбрана Робертас Каунас предупреди дека Русија би можела да разгледува сценарија за таканаречени операции „под лажно знаме“ насочени кон земјите членки на НАТО во балтичкиот регион.
Според проценките на литванските власти, Москва наводно разгледува можност за изведување неконвенционални напади врз критична инфраструктура во Балтикот, при што би можеле да бидат употребени дронови од украинско производство со цел одговорноста за евентуалниот инцидент да биде префрлена на Украина.
Каунас изјавил дека литванските институции добиле информации според кои Русија размислува за можни напади врз инфраструктурата, но нагласил дека засега нема конкретен датум или потврда дека таков напад е непосредно планиран.
„Имаме информации дека Русија разгледува изведување неконвенционални кинетички напади врз критична инфраструктура во балтичкиот регион. Можно е за таа цел да бидат употребени дронови произведени во Украина“, изјавил литванскиот министер, пренесува литванскиот јавен сервис LRT.
Тој додал дека литванските власти внимателно ја следат ситуацијата и разменуваат информации со Полска и останатите сојузници во НАТО.
Сценарио со дронови што би ја сокрило вистинската трага
Според литванската агенција BNS, едно од сценаријата што наводно се разгледуваат вклучува употреба на дронови кои би биле претставени како украински.
Во такво сценарио, леталата би можеле да бидат запленети од Украина или дополнително изменети за да изгледаат како украински дронови, а потоа употребени за напад врз критични објекти во балтичкиот регион.
Целта на ваквата операција, според проценките на литванските власти, би можела да биде создавање впечаток дека Украина стои зад нападот и тестирање на реакцијата на НАТО.
За можноста за вакво сценарио известувале и литванскиот портал 15min и британскиот „Гардијан“.
Каунас оценил дека евентуален напад со летало кое би изгледало како украинско би можел да биде обид на Москва да ја провери подготвеноста на НАТО да продолжи со поддршката за Украина.
Литванија не очекува класична руска инвазија
И покрај предупредувањата, литванскиот министер нагласил дека ризикот од директен и конвенционален руски воен напад врз Литванија во моментов се оценува како низок.
Тој посочил дека нема показатели дека Русија распоредува дополнителни воени сили во близина на литванската граница.
Сепак, според проценките на Литванија и дел од нејзините сојузници во НАТО, сценаријата поврзани со беспилотни летала и можни саботажи се сметаат за посериозен ризик.
Војската веќе ја обезбедува критичната инфраструктура
Литванските вооружени сили од 18 јуни им помагаат на безбедносните служби во заштитата на неколку клучни објекти во земјата.
Меѓу нив се терминалот за течен природен гас во Клајпеда, електроенергетската интерконекција LitPol Link со Полска, трансформаторската станица во областа Алитус и хидроцентралата Круонис.
Литванскиот министер за одбрана на 17 јули ја продолжил воената поддршка за овие безбедносни операции до 19 август. Во активностите може да бидат ангажирани до 30 војници, транспортни возила и едно пловило.
Русија ги отфрла обвинувањата дека планира напади врз членки на НАТО. Литванските власти, сепак, предупредуваат дека енергетската и транспортната инфраструктура во регионот останува потенцијално ранлива на провокации, саботажи и други форми на хибридни закани.
Најновите предупредувања од Вилнус доаѓаат по повеќемесечни изјави на високи претставници од Полска, Латвија и Литванија за можноста од дополнително зголемување на тензиите со Москва.
Литванија во последните месеци повеќепати подигнувала степен на тревога поради забележани дронови во нејзиниот воздушен простор, што дополнително ја зголемува загриженоста во земјата за безбедноста на критичната инфраструктура.
