Американската војска и Крајбрежната стража започнаа една од најризичните поморски операции во поновата историја, откако по повеќе од две недели потера низ Атлантикот се обидоа да запленат нафтен танкер под руско знаме, поврзан со Венецуела. Операцијата, за која денеска објави Reuters, се одвивала во близина на Исланд, во момент кога во пошироката област се наоѓале и руски воени пловила, меѓу кои и подморница.
Танкерот, првично познат како „Бела-1“, а подоцна регистриран под името „Маринера“, наводно одбил да дозволи качување на американските сили и успеал да се протне низ американската поморска „блокада“ на санкционирани бродови. Според американски официјални лица, пловилото било празно, но неговото движење и сопственичките врски го направиле цел на високоризична акција.
Ова се смета за прв обид на САД директно да запленат пловен објект под руско знаме, што потенцијално може сериозно да ги влоши односите со Москва. Дополнителна тежина на ситуацијата ѝ дава фактот што танкерот бил санкциониран уште во 2024 година, поради сомнежи за шверц на нафта за компании поврзани со милитантната група Хезболах.
Операцијата е дел од пошироката стратегија на администрацијата на Доналд Трамп за силен притисок врз Венецуела и нејзините поморски рути. Американските власти потврдија дека паралелно бил пресретнат и друг танкер поврзан со Венецуела во водите на Латинска Америка.
Овие настани следат само неколку дена по драматичната рација во Каракас, кога американските специјални сили го уапсија Николас Мадуро и го префрлија во САД. Венецуелските власти акцијата ја нарекоа „киднапирање“ и ги обвинија САД за обид да ги преземат најголемите нафтени резерви во светот.
Ситуацијата на Атлантикот отвора сериозни прашања за следниот чекор на големите сили и дали оваа поморска конфронтација може да прерасне во многу поширок геополитички судир.
