Швајцарските власти пред малку ги изнесоа првите официјални информации за пожарот што ја потресе земјата на новогодишната ноќ, објаснувајќи ја точната хронологија на трагичните настани.
Чад бил забележан во 1:31 часот по полноќ, а само една минута подоцна, во 1:32, на местото пристигнале првите полициски патроли. За многу кратко време биле ангажирани и дополнителни екипи на итната медицинска помош, пожарникари и други служби од целиот кантон.
Повредените лица биле евакуирани и транспортирани во повеќе болници низ регионот, додека противпожарните екипи успеале релативно брзо да го стават пожарот под контрола и да спречат негово понатамошно ширење.
Надлежните институции веднаш започнале со истрага за утврдување на причините за несреќата. До 5 часот наутро, според официјалните информации, сите повредени биле медицински згрижени.
Најновите потврдени податоци говорат за најмалку 40 загинати и 115 повредени лица, при што значителен дел од повредените се во тешка и животозагрозувачка состојба. Истрагата продолжува, а јавноста очекува дополнителни детали во текот на денот.
