Објавена е новата мапа на безбедносни ризици за 2027 година, која покажува во кои држави туристите треба да бидат особено внимателни при планирањето патувања.
Мапата ја изработила американската безбедносна компанија „Глобал Гардијан“, анализирајќи седум фактори, меѓу кои криминал, вооружени конфликти, тероризам, политички немири, здравствена заштита, инфраструктура и природни катастрофи.
Највисоката категорија, означена како „екстремен ризик“, опфаќа држави како Авганистан, Иран, Украина, Сирија, Јемен, Судан, Сомалија, Мјанмар и Хаити, како и Појасот Газа.
Една од најзначајните промени се однесува на Иран, кој е преместен во категоријата со најголем ризик поради политичката ситуација и опасноста од произволни апсења на странски државјани.
Влошена е и проценката за Бахреин и Кувајт, додека Катар, Обединетите Арапски Емирати, Јордан и Саудиска Арабија се означени со среден ризик.
Мексико останува во категоријата со висок ризик, пред сè поради насилството поврзано со наркокартелите. Посебно внимание се препорачува и за Еквадор, каде што се бележи зголемено криминално насилство.
Кај Турција и Египет ризиците се разликуваат според регионот. Во Турција најризични се пограничните области со Сирија, Ирак и Иран, додека во Египет се издвојуваат Северен Синај и одредени пустински региони.
Од друга страна, Јамајка и Јужна Кореја добиле подобри безбедносни оценки.
Хрватска останува во категоријата со најнизок ризик.
Од компанијата нагласуваат дека мапата не претставува официјално државно предупредување и дека патниците пред заминување треба да ги проверат актуелните препораки на надлежните институции.
