Грција најави забрана за користење социјални мрежи од страна на деца помлади од 15 години, која треба да започне да се применува од 1 јануари 2027 година.
Мерките ги претставија државниот министер Акис Скерцос, министерот за здравство Адонис Георгиадис и министерот за дигитална администрација Димитрис Папастергиу.
Предложениот закон предвидува ограничување на пристапот до ТикТок, Фејсбук, Инстаграм, Икс и други платформи што користат алгоритми за задржување на вниманието на корисниците.
Според најавите, грчкиот парламент треба да гласа за законското решение на 22 октомври.
Властите објаснуваат дека целта е заштита на менталното здравје на децата и намалување на прекумерната употреба на дигитални платформи.
Според претставените податоци, повеќе од половина од грчките средношколци почнале да користат социјални мрежи на возраст меѓу 10 и 12 години.
Секој четврти ученик признава прекумерна употреба на социјалните мрежи, додека секое петто дете чувствува вознемиреност, несигурност или проблеми со концентрацијата кога нема пристап до паметен телефон.
Новите правила предвидуваат технолошките компании да воспостават механизми за проверка на возраста и да го ограничат пристапот на малолетниците.
Грчките власти нагласуваат дека одговорноста за безбедноста на децата на интернет не треба да биде само на родителите, туку и на платформите и државните институции.
Законот сè уште не е изгласан, а неговото усвојување е предвидено за 22 октомври, со планирана примена од почетокот на 2027 година.
