Според информациите објавени од српски „Курир“, министрите за надворешни работи на Европската Унија во понеделникот, 12 октомври, усвоиле ново проширување на санкциите против Русија, насочено првенствено кон нејзината воена индустрија.
Новите мерки, според извештајот, опфаќаат 826 компании и 743 лица, односно вкупно 1.569 нови записи на санкциската листа.
Меѓу засегнатите се производители и добавувачи на компоненти за балистички ракети, беспилотни летала, авиони, експлозиви, муниција и електронска опрема.
Високата претставничка на ЕУ за надворешна политика, Каја Калас, изјавила дека повеќе од половината нови санкции се поврзани со производствениот синџир на балистички ракети што Русија ги користи во војната против Украина.
Според податоците наведени во извештајот, санкционираните компании вработуваат над 250.000 луѓе и имаат годишен промет од најмалку 20 милијарди евра.
Дополнително, на санкциската листа се ставени 74 пратеници од руската Државна дума и тројца членови на Централната изборна комисија, поради нивната поврзаност со организирањето избори на окупираните украински територии.
Мерки се воведени и против три лица и четири правни субјекти од Северна Кореја, поради воената и економската соработка со Москва.
Санкционираните лица и компании ќе се соочат со замрзнување на имотот во ЕУ и финансиски ограничувања, додека за физичките лица важи и забрана за влез во земјите членки.
Со најновото проширување, вкупниот број лица и правни субјекти опфатени со санкцискиот режим на Европската Унија поради војната во Украина достигнува речиси 4.600.
