Индија повторно се соочува со вирусот Нипах, еден од најопасните патогени што периодично се појавуваат на потконтинентот и предизвикуваат сериозна загриженост кај здравствените власти. Во сојузната држава Западен Бенгал се потврдени пет заболени лица, при што сите случаи се поврзани со приватна болница во градот Барасат. Мажот кој се смета за прв случај починал уште пред да пристигнат резултатите од лабораториските тестирања.
Расте бројот на заразени со вирусот Нипах
Ситуацијата дополнително ја отежнува фактот што заразените лица се исклучиво здравствени работници – лекари и медицински сестри. Ова сериозно го комплицира одговорот на здравствениот систем и ја зголемува опасноста од понатамошно ширење на вирусот. Надлежните служби брзо идентификувале околу 200 лица кои биле во контакт со заразените. Приближно половина од нив веќе се префрлени во карантин, каде ќе останат 21 ден, колку што изнесува максималниот инкубациски период на вирусот. Сите тестови засега се негативни, но епидемиолозите предупредуваат дека ситуацијата мора да се следи постојано, буквално од час во час. Според локалните медиуми, во меѓувреме се појавиле уште два нови случаи.
Вирусот Нипах најчесто потекнува од овошни лилјаци и може да се пренесе директно од човек на човек или преку консумирање контаминирана храна. За првпат е откриен во 1999 година во Малезија, а оттогаш повремено се појавува во Индија, Бангладеш и на Филипините. Посебно е опасен затоа што во почетната фаза симптомите личат на грип, по што болеста може нагло да премине во тешки респираторни и невролошки состојби, вклучувајќи воспаление на мозокот, напади и кома.
Смртност и до 75 проценти
Според податоците на Светската здравствена организација, стапката на смртност кај вирусот Нипах се движи меѓу 40 и 75 проценти. Во моментов не постојат вакцина ниту специфична терапија за оваа болест, а лекувањето е исклучиво симптоматско и поддржувачко, што дополнително ја зголемува загриженоста при секоја нова појава на вирусот.
Двајца пациенти од актуелниот кластер се префрлени во специјализирана болница во Калкута. Според официјалните информации, состојбата на медицинската сестра е постабилна, додека другиот пациент се наоѓа во исклучително тешка здравствена состојба. Стручњаците предупредуваат дека ваквите појави јасно покажуваат колку брзо вирусот Нипах може да го наруши функционирањето на здравствениот систем, особено кога меѓу првите заразени се токму оние што треба да ги заштитат другите.
Новите случаи во Западен Бенгал уште еднаш ја нагласуваат сериозната опасност што ја носи овој вирус, како и важноста од рано препознавање на симптомите, користење соодветна заштитна опрема во болниците и брза реакција на епидемиолошките тимови. Индиските власти тврдат дека состојбата е „под контрола“, но мерките на претпазливост остануваат на највисоко ниво.
