Во источниот дел на Демократска Република Конго е регистрирана нова епидемија на ебола, откако највисоката здравствена агенција на континентот соопшти дека се појавил нов бран на заразата во провинцијата Итури.
Според податоците, досега се пријавени околу 246 случаи и најмалку 65 смртни исходи, главно во рударските градови Монгвалу и Рвампара. Информациите ги објави Africa Centres for Disease Control and Prevention, која ја следи состојбата на терен.
Од здравствените власти е соопштено дека веќе се организираат координациски состаноци со Уганда, Јужен Судан и други меѓународни партнери со цел да се спречи понатамошно ширење на вирусот преку прекуграничен надзор и заеднички мерки.
Прелиминарните лабораториски анализи во главниот град Киншаса покажале присуство на вирусот кај дел од тестираните примероци, што дополнително ја потврдило сериозноста на ситуацијата. Од вкупно 65 пријавени смртни случаи, четири досега се лабораториски потврдени како последица на ебола.
Иако се пријавуваат нови сомнителни случаи и во провинцискиот центар Бунија, официјалната лабораториска потврда сè уште се чека за дел од пациентите. Засега, владата на Демократска Република Конго сè уште не објавила формално прогласување на епидемија, иако здравствените институции интензивно работат на проценка на ризикот.
Еболата е една од најопасните вирусни болести, позната по тоа што се пренесува преку директен контакт со телесни течности и може да предизвика тешки крвавења и откажување на органите. Раните симптоми често вклучуваат треска, замор, главоболка и болки во мускулите, а за болеста сè уште нема специфичен лек.
Провинцијата Итури, каде што е регистриран новиот бран, е под воена управа од 2021 година поради присуство на бројни вооружени групи, што дополнително ја отежнува контролата врз епидемијата.
Според историските податоци, еболата за првпат е идентификувана во 1976 година на територијата на денешна Демократска Република Конго и оттогаш во регионот се забележани повеќе епидемии, од кои некои со илјадници жртви.
