Светските цени на храната продолжија да растат и во август, втор месец по ред, достигнувајќи го највисокото ниво од ноември 2022 година, покажуваат најновите податоци на Организацијата за храна и земјоделство на Обединетите нации – ФАО.
Индексот на цените на храната на ФАО, кој ги следи меѓународните цени на основните земјоделски производи, во август достигнал 133,3 поени, што е раст од 1,9 проценти во однос на јули.
Најголем месечен скок е забележан кај шеќерот – дури 11,9 проценти. Индексот за оваа категорија достигнал 106,4 поени, највисоко ниво од јуни 2025 година.
Според ФАО, на светските пазари расте загриженоста околу снабдувањето со шеќер во сезоната 2026/27. Топлото и суво време ги намалило прогнозите за приносите на шеќерна репка во Европската Унија, додека временските услови поврзани со Ел Нињо влијаат врз очекувањата за производството во делови од Азија.
Поскапеле и млечните производи, чиј индекс се зголемил за 2,3 проценти, пред сè поради повисоките цени на млекото во прав и сирењето.
Житарките во август поскапеле за 2,2 проценти и достигнале највисоко ниво од мај 2024 година. Растот бил поттикнат од силната побарувачка, временските ризици во важни производствени региони и неизвесноста околу извозните текови преку Црното Море.
Нагоре се движеле и цените на месото, за еден процент во однос на претходниот месец, додека растителните масла поскапеле за 0,6 проценти и достигнале највисоко ниво од јуни 2022 година.
Вкупниот индекс на ФАО сега е за 2,5 проценти повисок во споредба со август минатата година. Сепак, светските цени на храната и понатаму се 16,8 проценти под рекордното ниво забележано во март 2022 година.
Растот на глобалните цени не значи автоматски исто поскапување во продавниците, бидејќи крајните малопродажни цени зависат и од транспортот, енергијата, курсевите, даноците и состојбата на домашните пазари.
