Една необична приказна од Втората светска војна повторно го привлече вниманието на јавноста. На 2 септември 1944 година, воениот пилот Андрија Араповиќ, припадник на воздухопловството на Независната Држава Хрватска (НДХ), со борбен авион пребегнал кај партизаните на островот Вис, каде што тогаш престојувал Јосип Броз Тито.
Араповиќ управувал со италијанскиот ловец „Фиат Г.50 бис“, со воена ознака 3505. За време на летот се одвоил од придружниот авион и го променил правецот, слетувајќи на територија под контрола на партизаните.
По слетувањето, леталото било преземено од партизанските сили, а ознаките на НДХ биле заменети со црвени петокраки.
Зачувани се и фотографии на кои Тито го разгледува авионот на Вис.
Авионот потоа бил користен за воздушна заштита и придружба на леталата со кои патувале припадниците на партизанскиот Врховен штаб. Во ноември 1944 година пристигнал во ослободениот Белград.
По војната, Араповиќ ја продолжил кариерата како инструктор за летање во југословенското воздухопловство.
Особено интересна е судбината на самиот авион, кој денес се смета за единствениот зачуван примерок од моделот „Фиат Г.50“ во светот.
Во 1951 година бил предаден на Воениот музеј во Белград, каде што бил изложен со носот забиен во земја, како симбол на победата над фашизмот.
Подоцна бил префрлен во Музејот на воздухопловството во Белград.
Во седумдесеттите години Италија покажала интерес да го добие реткиот авион, но неговото префрлање било спречено.
Според историските сведоштва, клучен аргумент за неговото задржување била токму фотографијата на Тито покрај леталото.
Иако постоеле планови за реставрација, тие никогаш не биле реализирани.
Денес, повеќе од осум децении по историскиот лет, авионот останува редок музејски експонат и сведоштво за еден необичен настан од воената историја на поранешна Југославија.
