Необична интервенција на полицијата ги насмеа жителите на германскиот град Милхајм, откако алармот за кражба во еден супермаркет се активирал поради неочекуван „посетител“.
Службениците пристигнале во продавницата во близина на Франкфурт очекувајќи да затекнат провалник, но наместо човек кој незаконски влегол во објектот, во влезниот дел ги пречекал мал еж.
Германската полиција со доза на хумор го опишала случајот, наведувајќи дека станувало збор за „мал, тркалезен четириножен натрапник“, кој очигледно немал никакви криминални намери.
Според првичните претпоставки, ежот успеал да влезе во супермаркетот во текот на денот, но останал заробен внатре откако продавницата била затворена. Додека го истражувал просторот, најверојатно случајно го активирал безбедносниот систем, предизвикувајќи тревога и полициска реакција.
По пристигнувањето на полицијата, животното било внимателно проверено за да се утврди дали е повредено. Откако било констатирано дека е во добра состојба, малиот „натрапник“ бил вратен во неговото природно живеалиште.
Случајот предизвика внимание поради необичната причина за полициската интервенција, која наместо потрага по крадец, завршила со спасување на еден љубопитен еж.
