Необична сцена ги изненади жителите и возачите во романскиот град Клуж, откако на патиштата се појави авион кој изгледал како да „слетал“ среде улица.
Сепак, не станувало збор за вистинска авионска несреќа, туку за специјален вонгабаритен транспорт кој пренесувал дел од авион до Меѓународниот аеродром „Аврам Јанку“.
Според романските медиуми, огромниот конвој во ноќта меѓу понеделникот и вторникот пристигнал до кружниот тек кај Баиле Бајица во Герла, предизвикувајќи големо внимание кај минувачите и возачите кои не очекувале ваква глетка.
Транспортот бил однапред одобрен и се одвивал со специјална патна придружба. Конвојот тргнал од Националниот аеродром „Хенри Коанда“, а целата операција била планирана да трае од 10 до 19 јули.
Авионот морал да биде расклопен за да помине низ патиштата
Поради огромните димензии, авионот бил прилагоден за транспорт – му биле демонтирани крилата за полесно и побезбедно движење низ патната инфраструктура.
Како што пренесуваат локалните медиуми, поради големината на товарот, возилото се движело со намалена брзина, а минувањето низ Клуж-Напока предизвикало привремени ограничувања во сообраќајот на улицата „Трајан Вуја“.
Иако за возачите глетката изгледала нереално, транспортот бил дел од внимателно планирана операција со цел авионот безбедно да стигне до крајната дестинација.
Стар авион ќе добие нова улога
Станува збор за оштетен и веќе неактивен авион кој нема повторно да лета, туку ќе се користи за специјализирани обуки.
Од Советот на округот Клуж информирале дека авионот ќе служи како симулатор за тренинг на безбедносни процедури, евакуации и справување со итни ситуации.
Новиот тренажен авион е проценет на околу 460.000 леи и е од типот „narrow body“, односно авион со тесен труп. Такви авиони најчесто се користат за кратки и домашни линии, како моделите „Боинг 737“ и „Ербас А320“.
Со неговото поставување, надлежните очекуваат да се подобрат условите за практична обука и подготовка на персоналот за различни кризни ситуации во воздушниот сообраќај.
