Неверојатна приказна што звучи како сцена од филм повторно стана вирална на социјалните мрежи. Британскиот колекционер Ник Мид во 2017 година купил стар руски тенк без да има поим дека во него е скриено богатство вредно милиони евра.
Мид, кој поседува една од најимпресивните приватни колекции на воени возила во Велика Британија, преку eBay купил половен советски тенк Т-54 за околу 30.000 фунти. Оклопното возило, произведено во 1980-тите, имало поминато околу 2.400 километри, а претходниот сопственик веќе ги заменил гасениците и моторот – без да забележи ништо необично.
Сè се променило кога Мид решил детално да го прегледа тенкот. При проверката открил скриен преграден простор, внимателно маскиран во внатрешноста на возилото. Внатре го чекало шокантно откритие – златни прачки чија вредност, според проценките, денес би надминала три милиони евра.
Откритието веднаш го привлече вниманието на јавноста и властите. Потеклото на златото никогаш не било целосно разјаснето, но една од теориите вели дека за време на инвазијата на Кувајт во 1990 година, ирачки сили ограбиле вреден товар и го сокриле во тенкот. Подоцна, возилото било запленето и со години кружело низ Европа, сè додека не завршило во приватна продажба.
Мид тврди дека постапил како „примерен граѓанин“ и веднаш ги предал златните прачки на властите. Двајца офицери дошле да ги преземат, а тој добил официјална потврда. Сепак, со текот на времето, признава дека жали за одлуката.
„Тоа беше грешка. Не добив апсолутно ништо, ниту надомест за пронаоѓач. Луѓето мислеа дека сме го задржале златото, но вистината е дека го предадовме сè“, изјави тој за британските медиуми.
Со доза на хумор, но и очигледна горчина, Мид подоцна додаде дека доколку знаел како ќе заврши приказната, ќе постапел поинаку. Што точно се случило со златото – дали е вратено, конфискувано или исчезнало во бирократските лавиринти – до ден-денес останува мистерија.
Приказната за „тенкот со злато“ и натаму важи за една од најневеројатните случаи на случајно пронајдено богатство во поновата историја.
