Европа во последниот период се соочува со екстремни горештини, поројни дождови и силни временски непогоди, а климатолозите предупредуваат дека ваквите појави би можеле сè почесто да стануваат дел од секојдневието.
Германскиот метеоролог и климатолог Андреас Јегер излезе со особено впечатливо предупредување, оценувајќи дека сегашното лето би можело да биде меѓу „најстудените“ што ќе ги искусиме во далечната иднина.
„Ова е веројатно најстуденото лето во следните 300 години“, порача Јегер.
Неговата изјава доаѓа по екстремните временски услови во австриски Тирол, каде по интензивниот топлотен бран следуваа поројни дождови и одрони од кал.
Според Јегер, температурните екстреми и силните бури не треба да се гледаат само како краткотрајни аномалии, туку како дел од пошироките климатски промени.
Тој посочува дека во текот на јуни биле регистрирани исклучително високи температури, а повеќе од половина од мерните станици, вклучително и оние во австриските Алпи, забележале рекордни вредности.
Климатологот предупредува и дека последиците не се ограничени само на високите температури. Водните ресурси и земјоделството се меѓу областите кои би можеле да бидат најсилно погодени.
Посебен проблем претставува намалувањето на снежната покривка во планинските региони. Снегот постепено се топи и придонесува за обновување на подземните води, додека при краткотрајни и интензивни врнежи голем дел од водата брзо истекува и почвата не успева да ја задржи.
Токму затоа, предупредува Јегер, можни се навидум спротивставени екстреми – силни поројни дождови и поплави во еден период, а долготрајни суши и недостиг од вода во друг.
