Жестоки борби се водат меѓу бунтовничкото движење Хути, кое продолжува да напредува, и силите кои ја поддржуваат меѓународно признатата влада на Јемен, и тоа на две стратешки важни точки во земјата, пренесува „Ал Џезира“.
Директни судири избиле во областа Кадха, во округот Макбана, во близина на градот Таиз на југозападот од земјата. Во исто време, според извори цитирани од „Ал Џезира“, движењето Ансар Алах, предводено од Хутите, напредува кон стратешки важниот град Мариб на северот, но наидува на силен отпор од јеменските владини сили.
Станува збор за први директни судири откако Хутите го презедоа Мока. Владините сили, со поддршка од воздушни напади, водат жестоки борби на фронтот кај Кадха, додека на двете страни пристигнуваат дополнителни засилувања.
Според „Ал Џезира“, владините сили успеале да одбијат голем напад на Хутите во областите Ал-Машџа и Ал-Зур, западно од Мариб.
Борби се водат и во близина на стратешки важниот камп Мас, каде се регистрирани интензивна артилериска размена и воздушни напади врз засилувањата на Хутите кои пристигнуваат преку округот Сарвах.
Мариб и Таиз се сметаат за две од главните упоришта на јеменската влада.
Мариб има особено значење бидејќи претставува последното големо нафтено и гасно подрачје под контрола на јеменската влада. Во градот се наоѓаат и важни воени објекти, а тој служи како главна логистичка база на владините сили во северниот дел на земјата.
Според оценката на „Ал Џезира“, евентуалниот пад на Мариб би можел сериозно да го ослаби присуството на владата во северен Јемен и да им овозможи на Хутите да воспостават контрола врз преостанатите енергетски ресурси во тој дел од земјата.
