Грчкиот министер за здравство, Адонис Георгиадис, на својот роденден се соочил со необичен хакерски напад, откако непознати лица, според неговите тврдења, му ја хакирале електронската пошта и во негово име испратиле нарачки за 200 луксузни автомобили и 25 парчиња оружје.
Според објавата на министерот на социјалната мрежа Икс, непознатите лица нарачале 150 автомобили Porsche Cayenne, 50 Mercedes-Maybach, 24 ловечки пушки Benelli и еден пиштол Springfield Armory Echelon.
Георгиадис открил што се случило кога утрото ја проверил својата електронска пошта и ги забележал испратените пораки.
Во една од нив, адресирана до компанијата „Порше“, испраќачот се претставил како грчкиот министер за здравство и побарал 150 автомобили за себе и за својата сопруга.
Во друга порака биле побарани 50 автомобили „Мерцедес-Мајбах“, со барање да бидат доставени на неговата домашна адреса.
Министерот го пријавил случајот во грчката Служба за борба против електронски криминал и најавил правни мерки против одговорните.
И покрај сериозноста на злоупотребата, Георгиадис одлучил јавно да реагира со доза хумор.
„Им благодарам за оригиналниот начин на кој ми го честитаа роденденот. За среќа, немам такви неостварени желби“, напишал министерот.
Тој објаснил дека случајот го објавил и за да спречи недоразбирања, односно некој да помисли дека навистина ги направил нарачките.
Засега не е познато кој стои зад нападот, ниту како непознатите лица добиле пристап до неговата електронска пошта.
Нема информации дека возилата или оружјето навистина биле купени или испорачани.
