Шервин Москович уште од детството знаел дека е посвоен, но никогаш не престанал да се прашува кои се неговите биолошки родители и каква е приказната за неговото раѓање. Иако израснал во семејство исполнето со љубов, желбата да го открие своето потекло останала со него со децении.
Пресвртниот момент дошол околу неговиот 35-ти роденден, кога случајно решил да пребарува стари весници во локалната библиотека. Таму наишол на текст за новороденче пронајдено во хартиена кеса оставена во автомобил на лекар во 1964 година.
На фотографијата објавена покрај веста веднаш препознал нешто необично.
„Ова бебе личи на мене“, си помислил.
Откако се обратил во Центарот за социјална работа, првично му рекле дека најверојатно не станува збор за него. Но, кратко потоа повторно го повикале и му потврдиле дека токму тој бил бебето пронајдено во автомобилот. Со тоа конечно дознал како започнал неговиот живот.
Иако ги контактирал луѓето кои биле вклучени во случајот, вистинскиот пробив дошол дури во 2016 година, кога направил ДНК тест. Анализата открила дека има полубраќа и полусестри, а преку нив стигнал и до својот биолошки татко, кој живеел во истиот град.
Средбата со таткото била емотивна, но не ги дала сите одговори што ги барал. Тој не можел да му открие која е неговата биолошка мајка, па Шервин и денес продолжува да ја бара.
И покрај сè што преживеал, вели дека доколку некогаш ја сретне, нема да ја осудува. Единственото што сака да ѝ каже е едноставно:
„Благодарам. Да не ме оставеше таму каде што ме пронајдоа, можеби никогаш немаше да го имам животот што го живеам денес.“
