Во Норвешка постои град во кој жителите речиси половина година не можат да почувствуваат директна сончева светлина, иако сонцето секојдневно се појавува над околните планини.
Станува збор за Рјукан, мал град во областа Телемарк, во јужниот дел на Норвешка, со нешто повеќе од 3.300 жители.
Поради високите планини што го опкружуваат, од септември до март сончевите зраци не допираат директно до центарот на градот.
Иако во текот на денот има природна светлина, жителите со месеци живеат во сенка. Сонцето може да се види на планинските врвови, но не и да се почувствува на градските улици.
За да го решат овој необичен проблем, локалните власти реализирале интересен проект со поставување огромни огледала на планината над градот.
Огледалата ја одбиваат сончевата светлина и ја насочуваат кон главниот градски плоштад, овозможувајќи им на жителите да уживаат во сончевите зраци дури и во периодот кога градот е во сенка.
Системот користи специјални огледала што го следат движењето на сонцето и автоматски го приспособуваат својот агол, со цел светлината да биде насочена кон плоштадот.
Проектот претставува необичен пример за тоа како технологијата може да помогне во надминување на природните географски ограничувања.
Рјукан денес е познат токму по своите сончеви огледала, кои станаа туристичка атракција и симбол на градот.
Додека поголемиот дел од светот ја добива сончевата светлина природно, жителите на овој норвешки град морале да пронајдат начин буквално да го „донесат“ сонцето на својот плоштад.






