Силни снежни врнежи, замрзнат дожд и опасна голомразица се очекуваат во делови од Европа во наредните денови, а метеоролошките служби предупредуваат на можни сериозни проблеми во сообраќајот.
Најизразени зимски услови се прогнозираат во Германија и во алпските региони на Австрија и Швајцарија.
Според Германската метеоролошка служба (DWD), во високите делови на Алпите би можеле да наврнат до 40 сантиметри нов снег, додека во пониските планински предели се очекува снежна покривка од 5 до 20 сантиметри.
Во подножјето на Алпите до понеделник наутро се прогнозираат меѓу 20 и 30 сантиметри снег, што би можело значително да го отежне движењето по патиштата, особено во Баварија.
Дополнителна опасност претставува замрзнатиот дожд, кој се очекува во текот на следната недела во делови од Германија. Метеоролозите предупредуваат дека дождот при контакт со студените површини може брзо да создаде опасен слој мраз на улиците, мостовите и тротоарите.
Во Австрија ситуацијата е уште посериозна. Во Тирол се прогнозираат околу 40 сантиметри нов снег, додека во регионот Форарлберг снежната покривка би можела да се зголеми за дополнителни 50 сантиметри.
Поради обилните врнежи, австриските служби предупредуваат и на зголемен ризик од лавини, особено на стрмните планински падини.
Слични предупредувања се издадени и во Швајцарија, каде што во делови од кантонот Вале е прогласено второто највисоко ниво на опасност од лавини.
Надлежните предупредуваат дека големи снежни маси би можеле да се активираат и да загрозат планински патишта.
На возачите и патниците им се препорачува зголемена внимателност, следење на временските прогнози и проверка на состојбата на патиштата пред патување.






