Рафинеријата Илски во Краснодарскиот крај била цел на напад со беспилотни летала во текот на ноќта на 26 септември, при што во објектот избил голем пожар. Снимките и фотографиите што се појавија на интернет прикажуваат пламен и густ чад во областа на рафинеријата.
Руски и украински канали кои ги следат воените случувања известиле за експлозии во близина на рафинеријата додека нападите со дронови продолжувале во текот на ноќта.
Гувернерот на Краснодарскиот крај, Венијамин Кондратјев, потврдил дека беспилотни летала го нападнале Северскиот округ, каде што се наоѓа рафинеријата. Според неговите информации, има загинати лица, додека едно лице било тешко повредено.
Кондратјев соопштил и дека остатоци од соборени беспилотни летала оштетиле станбена зграда. Во округот избиле пожари и во два индустриски објекти, но гувернерот не прецизирал за кои објекти станува збор.
Рускиот независен медиум АСТРА, повикувајќи се на анализа на снимки направени од очевидци, објави дека еден од пожарите избил токму во рафинеријата Илски. Сепак, независна потврда за тоа дека рафинеријата била меѓу погодените објекти, како и за точниот обем на штетата, не е достапна.
Рафинеријата Илски се наоѓа на околу 500 километри од територијата под контрола на Украина и претставува еден од поголемите нафтени капацитети во јужниот дел на Русија. Годишно произведува околу 6,6 милиони тони гориво.
Објектот и претходно бил мета на украински напади во текот на војната. Според податоците на АСТРА, до јуни годинава рафинеријата била погодена најмалку 16 пати.
Украинскиот Генералштаб потврдил напад врз рафинеријата и на 2 јуни, кога било соопштено дека избил голем пожар. Нов напад бил пријавен и на 8 август, кога украинската страна соопшти дека објектот бил погоден и дека на неговата територија избил пожар.
Краснодарскиот крај, кој има стратешко значење поради положбата долж руското црноморско крајбрежје, во последниот период сè почесто е цел на напади со украински беспилотни летала.
Во истата ноќ бил пријавен напад со дронови и врз Ростовската област. Тамошниот гувернер Јуриј Сљусар соопштил дека биле повредени пет цивили – едно лице во Таганрог и четири во Азов, меѓу кои и едно дете. Сите повредени биле хоспитализирани.
По падот на беспилотни летала во Азов биле оштетени повеќекатници, приватни куќи, индустриски објекти, училиште, дом на културата и автомобили. Во Ростов на Дон биле оштетени неколку автомобили.
Според Сљусар, руските системи за противвоздушна одбрана собориле повеќе од 30 беспилотни летала над Ростовската област.
