Француската калуѓерка сестра Андре, родена како Лусил Рандон на 11 февруари 1904 година, живеела неверојатни 118 години и била сведок на некои од најголемите историски настани.
Имала само осум години кога во 1912 година потонал „Титаник“, а подоцна ги доживеала двете светски војни, пандемијата на шпанскиот грип и коронавирусот.
Нејзиниот живот бил посветен на работата, верата и помагањето на другите.
Уште како дете започнала да работи, а подоцна била учителка. Во 1944 година се замонашила и го добила името сестра Андре.
Голем дел од животот поминала грижејќи се за болни, сирачиња и стари лица. Дури и во поодминати години продолжила да работи и да им помага на луѓето.
На 105-годишна возраст речиси целосно го изгубила видот, по што се преселила во старечки дом во францускиот град Тулон.
Посебно внимание привлече во 2021 година, кога на 116 години успешно го пребродила коронавирусот, без да развие симптоми.
Кога новинарите ја прашувале за тајната на нејзината долговечност, таа често ја истакнувала важноста на работата и чувството дека е потребна на другите.
Меѓу нејзините мали секојдневни задоволства биле чаша црвено вино и парче чоколадо.
Сестра Андре почина на 17 јануари 2023 година, само неколку недели пред својот 119. роденден.
Со своите 118 години и 340 дена, таа остана запаметена како една од најдолговечните луѓе во потврдената историја.
Нејзината животна приказна претставува сведоштво за повеќе од еден век исполнет со историски пресврти, лични предизвици и посветеност на другите.
