Францускиот ММА борец Матис Шевалие (28) се здобил со потрес на мозокот откако бил погоден со проектил со солзавец за време на протестите во Париз.
Инцидентот се случил на 17 октомври, на плоштадот Република, каде што голем број граѓани протестирале против високите трошоци за живот.
Според сведоштвото на Шевалие, бил погоден само пет минути по пристигнувањето на протестот.
„Во 13:50 часот пристигнав на плоштадот Република, а во 13:55 часот проектил со солзавец ме погоди директно во главата и експлодираше“, напишал спортистот на Инстаграм.
Тој објавил и фотографии на кои се гледаат рана на слепоочницата и голема модринка околу левото око.
Шевалие потврдил дека добил потрес на мозокот, додавајќи дека очилата што ги носел веројатно го заштитиле од уште потешки последици.
„Имам потрес на мозокот. За среќа, носев очила, кои сега се скршени. Немам што повеќе да додадам“, напишал 28-годишниот борец.
Шевалие во 2019 година ја освоил титулата аматерски европски шампион во ММА.
Инцидентот се случил во период на масовни демонстрации низ Франција, кои на одредени места прераснале во насилни судири меѓу полицијата и демонстрантите.
Според проценките на организаторите, на протестите на 17 октомври учествувале околу 800.000 луѓе.
Околностите под кои бил испукан проектилот засега не се независно потврдени.
Сè уште не е познато колку повредата ќе влијае врз враќањето на Шевалие на тренинзите и натпреварувањата.
