Германија ја обвини Русија дека стои зад обид за саботажа со дронови на аеродромот Лајпциг/Хале, а како одговор најави дипломатски и други мерки против Москва.
Според германските власти, инцидентот се случил на 4 август, кога во близина на паркирани украински карго-авиони бил пронајден дрон опремен со експлозивна направа. Според објавените информации, до експлозија не дошло поради дефект на детонаторот.
Истражителите проверуваат и други инциденти со беспилотни летала во околината на аеродромот, меѓу кои сомнение дека втор дрон дошол во контакт со товарен авион, како и пронаоѓањето уште едно летало десетина дена подоцна.
Лајпциг/Хале има значајна логистичка улога и се користи и за воени и товарни операции, вклучително и активности поврзани со украинската авиокомпанија „Антонов ерлајнс“.
Германскиот министер за внатрешни работи Александар Добринт оцени дека случајот се вклопува во образецот на хибридни операции кои Берлин ѝ ги припишува на Русија и предупреди дека Германија мора да биде подготвена и за идни слични закани.
Шефот на германската дипломатија Јохан Вадефул најави конкретни мерки, меѓу кои затворање на рускиот конзулат во Бон и Рускиот дом за наука и култура во Берлин. Рускиот амбасадор бил повикан и на разговор.
Берлин најави и построги мерки кон руската таканаречена „флота во сенка“, како и иницијатива за дополнителни европски санкции.
Генералниот секретар на НАТО Марк Руте и претседателката на Европската комисија Урсула фон дер Лајен изразија поддршка за Германија, додека Москва најави дека ќе одговори на германските мерки.
Германските тврдења за руска одговорност претставуваат сериозно обвинување во услови на веќе високи тензии меѓу Москва и европските земји. Деталите за доказите и целосните околности на инцидентот остануваат предмет на истрага.
