Вирусот на птичји грип, кој моментално се шири меѓу диви птици, живина и разни видови цицачи, може да претставува сериозна глобална закана доколку мутира и стане способен да се пренесува од човек на човек. Ова е предупредувањето што го упатија водечки експерти од Институтот Пастер во Франција.
Високо патогената варијанта H5 веќе предизвика уништување на стотици милиони птици ширум светот, наруши делови од синџирот за снабдување со храна и придонесе за раст на цените. Иако инфекциите кај луѓето засега се ретки, научниците силно предупредуваат дека ситуацијата ниту малку не е за игнорирање.
Мари-Ан Рамекс-Велти, медицинска директорка на Центарот за респираторни инфекции при Институтот Пастер, истакнува дека најголемата опасност е можната адаптација на вирусот кај цицачи, што би можело да ја отвори вратата за пренос меѓу луѓето. Според неа, таков развој би носел „потенцијално пандемиски вирус“ кој може да има многу потешки последици од Ковид-19 – особено затоа што луѓето немаат природни антитела против овој вид грип.
За разлика од Ковид, кој најмногу ги погодуваше ранливите групи, грипните вируси можат да бидат смртоносни и за здрави луѓе, вклучувајќи деца и млади. Ова е една од причините зошто експертите предупредуваат дека потенцијална пандемија на птичји грип би била исклучително сериозна.
И покрај предупредувањата, Светската организација за здравје на животните нагласува дека ризикот во овој момент е низок, но не и занемарлив. Според нив, граѓаните нема потреба да избегнуваат пилешко или да се плашат од контакт со природа – но глобалниот надзор мора да остане буден и подготвен.
Добрата вест, истакнуваат научниците, е дека човештвото денес е многу подобро подготвено отколку пред пандемијата со Ковид-19. Постојат веќе развиени кандидат-вакцини за H5, технологиите за забрзано производство се докажани, а на располагање се и антивирусни лекови кои може да бидат ефикасни.
Сепак, експертите се едногласни: ситуацијата мора внимателно да се следи бидејќи мутација која ќе овозможи човечки пренос може да го промени текот на сè.
