Русија изврши масовна ноќна офанзива врз Украина, користејќи комбинација од дронови и ракети, при што загинаа најмалку 11 лица, а над 100 се повредени.
Најтешко погоден е главниот град Киев, каде што, според градоначалникот Виталиј Кличко, оштетени се повеќе станбени објекти, а една зграда делумно се урнала. Остатоците од проектилите предизвикале пожари во здравствени установи, бензинска пумпа и други објекти, додека спасувачките екипи се уште работат на терен. Во Киев загинале најмалку четири лица, а десетици се повредени.
Во источниот град Днепар, нападите однеле уште најмалку седум животи, додека над 30 лица биле повредени. Штети и жртви се пријавени и во други региони низ земјата.
Украинската противвоздушна одбрана соопшти дека во текот на ноќта биле лансирани дури 73 ракети и 656 дронови, од кои значителен дел биле пресретнати.
Овој напад доаѓа по претходни закани од Москва за засилување на нападите, а украинскиот претседател Володимир Зеленски веќе предупреди дека Русија подготвува голема воздушна офанзива.
Од друга страна, рускиот претседател Владимир Путин одржал состанок поврзан со напад во регионот Луганск, за кој руските власти ја обвинуваат Украина. Киев, пак, ги негира овие тврдења и наведува дека цел бил воен објект.
Ситуацијата дополнително ја продлабочува тензијата, додека двете страни меѓусебно се обвинуваат за новата ескалација.
