Документи означени од американскиот Стејт департмент беа пронајдени во петокот наутро во деловниот центар на хотел во Алјаска, откривајќи непознати и потенцијално чувствителни детали за состаноците меѓу Доналд Трамп и Владимир Путин на 15 август во Енкориџ, објави NPR.
Осумте страници, кои се чини дека ги подготвил американскиот персонал, содржеле точни локации и времиња на самитите, телефонски броеви на американски функционери и протоколарни детали. Тројца гости на хотелот „Капетан Кук“ ги пронашле документите во јавен печатач, околу 20 минути од воената база Елмендорф-Ричардсон.
На првата страница беа наведени датумите и просториите за средбите, како и протоколарниот подарок на Трамп за Путин – статуа на американски орел. Следните страници откриваа имиња и телефони на тројца американски функционери, како и имињата на 13 американски и руски лидери со фонетски водич за изговор на руските имиња.
Страниците 6 и 7 опишуваа план за ручек, кој на крајот беше откажан, со детално наведени јадења: зелена салата, филе мињон и олимпија од камбала, а за десерт крем бруле. Планот за седење покажуваше Путин и Трамп еден спроти друг, со распределба на американските и руски официјални лица на нивните страни.
Заменик-секретарката за печат на Белата куќа, Ана Кели, го намали значењето на наодот, нарекувајќи ги документите „мени за ручек од повеќе страници“, додека експерти за национална безбедност предупредуваат на сериозен пропуст и небрежност во подготовката за состанок од ваков обем.
Пронајдените документи се нов пример на безбедносни пропусти во администрацијата на Трамп, по инциденти од типот на случајно вклучување на лица во чувствителни разговори за национална безбедност и воени операции.
