Иранскиот претседател Масуд Пезешкијан изјави дека преместувањето на главниот град од Техеран станало неизбежно поради екстремната пренатрупаност и сериозниот недостиг на вода. На состанок во Казвин, тој објасни дека Техеран не може да поднесе понатамошна изградба ниту раст на населението, а преносот на вода од Персискиот Залив би бил премногу скап.
Владата го идентификуваше регионoт Макран, во југоисточен Иран, како потенцијална локација за новиот главен град, иако не е објавен временски рок за преместувањето.
Според податоците на Бехзад Парса, директор на регионалната компанија за вода во Техеран, нивото на водата минатата недела е намалено за 43 проценти во однос на минатата година. Браната Амир Кабир сега содржи само 14 милиони кубни метри вода, што е осум проценти од нејзиниот капацитет, а намалувањето на водата започна да се чувствува низ целиот град. Официјалните лица предупредуваат дека чешмите наскоро би можеле целосно да се исушат.
Иако владата ги обвинува климатските промени и санкциите за водната криза, експертите истакнуваат дека причината лежи во децении на човечки грешки: прекумерна изградба на брани, сушење на водоносните слоеви и политизација во управувањето со водните ресурси.
Овој потег на Иран покажува дека проблемите со водата и пренатрупаноста стануваат толку сериозни што трансферот на главниот град се гледа како единствен начин за обезбедување на одржливост и животен стандард за идните генерации.
