Во американската држава Алабама беше извршено погубување со метод што предизвика големи полемики — азотна хипоксија, техника што првпат се користи за извршување на смртна казна во оваа земја.
Осудениот, 57-годишниот Ентони Тод Бојд, беше погубен во затворот во Атмор за убиство извршено во 1993 година. Тој и неговите соучесници го киднапирале Грегори Хагули поради долг од 200 долари поврзан со кокаин, потоа го полеале со бензин и го запалиле додека бил врзан.
По три децении судски постапки и неколку одложувања, егзекуцијата беше извршена откако Врховниот суд на САД одби да ја стопира. Во своите последни зборови, Бојд ја негирал вината и изјавил: „Не убив никого. Сакам сите да знаат дека во оваа земја нема правда.“
Методот на азотна хипоксија, кој предизвикува смрт преку лишување на телото од кислород со вдишување на азот, предизвика жестоки реакции меѓу правните експерти и активистите за човекови права. Неколку судијки на Врховниот суд, меѓу кои и Соња Сотомајор, остро се спротивставија, велејќи дека методот може да предизвика „болно задушување што трае неколку минути“.
Иако Бојд претходно барал да биде погубен со стрелачки вод, државата ја спроведе казната со новиот метод, кој сè уште е предмет на големи етички и медицински контроверзии во САД.
