Германскиот автомобилски гигант „Фолксваген“ се соочува со можен драматичен реструктурирачки потег кој би можел да влезе во историјата како еден од најголемите во автоиндустријата.
Според информации од лица запознаени со процесот, компанијата разгледува план за затворање на четири фабрики во Германија и отпуштање на речиси 100.000 работници. Меѓу објектите кои се споменуваат се погоните во Хановер, Цвикау, Емден и Некарсулм, што би засегнало десетици илјади вработени.
Овој потег доаѓа во период на силен притисок врз компанијата, предизвикан од зголемената конкуренција од кинеските производители, високите царини на американскиот пазар и слабата побарувачка во Европа. Според оценките, овие фактори го доведуваат во прашање досегашниот бизнис модел на „Фолксваген“.
Компанијата потврди дека работи на долгорочен план за реструктурирање, но засега не ги коментира деталите околу потенцијални затворања или масовни отпуштања. Одлуките треба да бидат разгледани на состанок на надзорниот одбор закажан за 9 јули.
Дополнително, извештаи од медиуми наведуваат дека „Фолксваген“ планира да ги намали инвестициите за околу 15 проценти во следните пет години, што би значело заштеди од десетици милијарди евра.
Доколку овие планови се реализираат, тоа би претставувало еден од најголемите потреси во европската автомобилска индустрија во последните децении.
