Рускиот претседател Владимир Путин остро ги предупреди Соединетите Американски Држави дека секој напад со американски ракети „Томахавк“ врз руска територија ќе биде одговорен со „многу силна и дури зачудувачка реакција“. Оваа изјава беше објавена преку руските државни медиуми како јасен знак дека Русија нема да толерира никаква ескалација на територијален напад.
Путин ја оцени можноста за испорака на овие ракети во Киев како обид за дополнителна ескалација на конфликтот во Украина и потенцира дека Русија ќе одговори одлучно доколку се почувствува загрозена.
Во врска со откажувањето на планираната билатерална средба од страна на американскиот претседател Доналд Трамп, Путин смета дека станува збор за одложување, а не за целосно откажување на разговорите. Воедно, рускиот лидер откри дека Трамп лично предложил одржување самит во Будимпешта, но дека е неопходна сериозна подготовка пред таков настан.
Путин истакна дека Русија секогаш била за продолжување на дијалогот и дека постојат многу области каде што Русија и САД можат да соработуваат доколку односите се градат на основа на сериозен и конструктивен дијалог, а не на притисок.
Во врска со новите санкции што ги воведе администрацијата на Трамп, Путин ги оцени како непријателски чекори кои не помагаат во зајакнувањето на руско-американските односи. Санкциите, кои се однесуваат на големите руски нафтени компании „Лукоил“ и „Роснефт“, се очекува да го намалат приливот во рускиот буџет, но Путин е уверен дека економијата на Русија ќе остане стабилна и дека енергетскиот сектор е доволно силен да издржи.
Тој нагласи дека Русија припаѓа на групата земји кои се почитуваат себеси и нема да донесуваат одлуки под притисок, нагласувајќи дека ваквите обиди за принуда се безуспешни кога станува збор за народот и државата каква што е Русија.
„Ова е обид за вршење притисок, но ниедна земја која се почитува себеси и ниеден народ не решава ништо на тој начин. Русија има привилегија да се смета себеси меѓу тие кои се почитуваат себеси“, порача Путин.
Дополнително, Путин ги коментираше и последиците од испораките на руска нафта врз светските цени, вклучително и влијанието врз САД, во разговор со Трамп.
Овие изјави Путин ги даде на XVII сесија на Конгресот на Руското географско друштво, при што уште еднаш ја потврди позицијата на Русија како држава која нема да попушти под надворешни притисоци.
Не дознавај последен- читај ПРВ.мк
