Германскиот канцелар Фридрих Мерц најави амбициозна надворешна политика со цел Германија да добие водечка улога во Европа и НАТО. Но, само два месеци по доаѓањето на функцијата, аналитичарите предупредуваат дека засега резултатите се ограничени, а декларациите поголеми од делата.
Мерц ја обвини владата на Олаф Шолц за пасивност, ветувајќи повеќе поддршка за Украина, поголеми трошоци за одбрана и дистанцирање од несигурната политика на Доналд Трамп. Сепак, на својата прва посета во Вашингтон, делуваше нервозно, а Трамп – според германските медиуми – доминирал со пораките. Планот за поголема независност од САД во безбедносната политика остана само на хартија.
Додека Мерц најавува водечка улога на Германија, во пракса земјата нема јасен став за клучни прашања – од испорака на ракетите „Таурус“ за Украина, до реална улога во Блискиот Исток. Притоа, односите со Полска се влошени, додека Франција останува потенцијален, но нестабилен сојузник.
Со изолација во конфликтот со Иран и отсуство на иницијативи во Газа, Германија засега само набљудува. Дојче Веле заклучува: визијата на Мерц сè уште не се претворила во акција, а „вистинскиот пат“ останува нејасна дестинација.
