Случајот со бруталното убиство на 21-годишниот син на украински политичар во виенскиот Донауштад е официјално решен. Двајца Украинци се уапсени во нивната татковина, осомничени дека го претепале младото момче во подземната гаража на луксузен хотел, а потоа го запалиле во автомобилот. Според истражителите, мотивот бил финансиски – грабеж на криптовалути.
Виенската полиција потврди на прес-конференција дека уапсила 19-годишник и 45-годишник, врз основа на меѓународна потерница, во соработка со украинските власти и Европол. Шефот на Канцеларијата за криминалистичка полиција во Виена, полковник Герхард Винклер, исклучи каква било политичка позадина на злосторството.
Сè укажува на алчност: од крипто-паричникот на жртвата е украдена значителна сума, а кај еден од осомничените била пронајдена голема количина американски долари.
Реконструкцијата на последните часови од животот на младиот човек, чиј татко е заменик-градоначалник на Харков, е застрашувачка. Студентот, кој живеел во Виена, исчезнал во четвртокот навечер, а неговото семејство набрзо го пријавило како исчезнат.
Истражителите открија дека сè започнало во подземната гаража на хотелот „Софител“, каде што, според снимките од безбедносните камери, бил совладан и брутално претепан. Обдукцијата покажала тешки изгореници и јасни знаци на тепање. „Неговото тело било изгорено 80 проценти“, изјави Винклер.
Напаѓачите потоа го ставиле на задното седиште од „мерцедес“ со украински регистарски таблички и го запалиле, веројатно за да ги прикријат трагите. Задушувањето или топлотниот удар се наведуваат како можни причини за смртта.
Клучната трага што ја доведе полицијата до сторителите била пронајдена во изгорениот автомобил – растопена боца со бензин, која укажувала дека пожарот бил подметнат. Остатоците од боцата ја довеле полицијата до снимките од виенска бензинска пумпа, каде осомничените биле видени како купуваат бензин.
По злосторството, двајцата осомничени побегнале во Украина. Полковник Винклер потврди дека тие нема да бидат екстрадирани во Австрија и дека кривична постапка против нив ќе се води во Украина, а австриското судство го префрли случајот на украинските власти.
Телото на младиот човек било пронајдено минатата среда, околу половина час по полноќ, во населбата Донауштад во Виена.
