Двајца американски војници загинаа, а уште еден се води како исчезнат по нападите во Јордан, соопшти Централната команда на САД (CENTCOM). Ова се првите американски воени жртви во директната криза со Иран по неколку месеци, во период кога тензиите меѓу двете страни повторно се зголемуваат.
Според американските власти, нападите вклучувале балистички ракети и беспилотни летала, а американските и партнерските сили се обиделе да ги одбијат заканите. Четворица војници биле пренесени во болница поради повреди, но подоцна биле пуштени на домашно лекување.
Имињата на загинатите војници сè уште не се објавени, бидејќи американската војска прво мора да ги информира нивните семејства.
Со најновите жртви, бројот на загинати американски војници во конфликтот достигна 15. Новите случувања доаѓаат во момент кога претходното примирје меѓу Вашингтон и Техеран е нарушено, а двете страни продолжуваат со напади.
Иранските власти тврдат дека во последните американски напади загинале десетици луѓе и дека биле погодени различни објекти во земјата. Од друга страна, американската војска наведува дека целта на нивните операции е намалување на иранските воени способности.
Во исто време, Иран наводно ги повикал своите регионални сојузници, вклучувајќи го и Хезболах, да бидат подготвени за можен поширок конфликт. Според либански медиуми, Техеран испратил порака дека периодот на чекање завршил и дека треба да започнат подготовки за различни воени сценарија.
Се зголемува стравувањето дека новата размена на удари може да прерасне во поголем регионален конфликт со непредвидливи последици.
