Израелските одбранбени сили (ИДФ) издадоа итни предупредувања за евакуација до жителите на девет села во јужен Либан, најавувајќи можни воздушни напади врз позиции на Хезболах.
Според соопштението, жителите на селата Какајет ал-Шубара, Каутариет Ел Сајада, Меруанија, Гасанија, Тефахта, Ирзај, Баблија, Инсар и Ал-Баисари се повикани да се повлечат најмалку еден километар од своите домови како мерка на безбедност пред планираните операции.
Портпаролот на ИДФ, полковник Авичај Адраи, изјави дека воените активности се насочени против Хезболах поради наводни прекршувања на договорот за прекин на огнот, нагласувајќи дека операциите не се насочени кон цивилното население.
Во исто време, израелската армија соопшти дека дрон лансиран од територијата на Либан активирал сирени во областа на планината Мерон, но дека инцидентот завршил без жртви или штети.
Либанската агенција ННА јави дека израелски воздушни напади утрово биле извршени врз градот Џохмор ел Шакиф на југот на земјата, додека повеќе населени места во регионот биле погодени од силно артилериско гранатирање.
Во меѓувреме, Израел и Либан се согласиле да го продолжат примирјето, првично прогласено од американскиот претседател Доналд Трамп на 16 април, за дополнителни 45 дена, соопшти Стејт департментот.
