Двајца припадници на американската Национална гарда се во критична состојба по вооружен напад пред Белата куќа. Полицијата идентификуваше дека напаѓачот е авганистански државјанин кој добил азил во САД.
Претседателот Доналд Трамп го осуди нападот, нарекувајќи го терористички чин:
„Ова беше монструозен напад од заседа, на само неколку чекори од Белата куќа. Овој одвратен напад беше чин на зло, на омраза, чин на тероризам, напад врз целата наша нација, злосторство против човештвото. Како претседател на Соединетите Американски Држави, решен сум дека тој што го изврши овој брутален напад ќе ја плати највисоката можна цена.“
Министерството за внатрешна безбедност го идентификува осомничениот како Рахманулах Лаканвал, авганистански државјанин кој дошол во САД во 2021 година како дел од операцијата „Сојузнички сили“. Тој поднел барање за азил во 2024 година, кое администрацијата на Трамп го одобрила во април. Лаканвал имал долгорочна соработка со американските владини агенции, вклучувајќи ја и ЦИА.
Претседателот Трамп додаде:
„Добив информација од Министерството за внатрешна безбедност дека станува збор за странски државјанин кој влегол во САД од Авганистан, тој бил на озлогласените летови организирани од администрацијата на Бајден, никој во тоа време не знаел кој влегува во нашата земја.“
Како последица на нападот, Службата за државјанство и имиграција на САД привремено ги суспендираше сите апликации за имиграција за авганистански граѓани. Администрацијата на Трамп исто така побара дополнителни 500 војници од Националната гарда да бидат распоредени во Вашингтон за засилување на безбедноста.
