Француската полиција направи значаен пробив во истрагата за дрската кражба во музејот Лувр, откако се пронајдени физички докази кои директно можат да ги поврзат осомничените со местото на злосторството. Според информациите на весникот „Паризиен“, меѓу доказите се наоѓаат мотоциклистичка кацига, ракавица и клучеви од камион – предмети што, според истражителите, ги користеле сторителите за време на грабежот.
Полицијата утврдила дека мобилната платформа од кранот, со која крадците се искачиле до балконот и прозорците на галеријата „Аполо“, била украдена од сопственик кој претходно ја понудил за продажба на веб-страницата Leboncoin. Сопственикот ја препознал својата опрема на видео-снимките прикажани на телевизиите и веднаш го пријавил случајот, што им помогнало на истражителите да го реконструираат начинот на кој бандата го подготвила и извршила грабежот.
Истражителите од Бригадата за сузбивање на криминалот (BRB) и Централната канцеларија за борба против трговијата со културни добра (OCBC) во моментов интензивно работат на идентификување на четворицата сторители. Елекот и опремата пронајдени на местото на настанот се веќе испратени на форензичка анализа, а новопронајдената кацига, според првичните сознанија, му припаѓала на еден од членовите на бандата.
Грабежот се случил во неделата наутро, околу 9:30 часот, кога четири лица провалиле во галеријата „Аполо“ во Лувр, користејќи механичка скала монтирана на возило. Тие го пробиле безбедносното стакло и украле девет непроценливи предмети од 19 век, меѓу кои и круната на царицата Евгенија, сопругата на Наполеон III. Дел од накитот е украсен со илјадници дијаманти и скапоцени камења.
Еден од предметите, токму круната на Евгенија, бил пронајден на местото на настанот, што укажува дека сторителите ја испуштиле во брзање додека бегале. Се претпоставува дека бандата внимателно го планирала нападот, но брзината на интервенцијата на полицијата ги принудила да се повлечат пред да ги земат сите предмети.
Француските власти сметаат дека ова е една од најорганизираните кражби на културно богатство во последните децении, а пронајдените докази може да бидат клучни во идентификувањето на сторителите и враќањето на украдените вредности.
Не дознавај последен - читај ПРВ.мк
