Американскиот претседател Доналд Трамп им соопштил на украинскиот претседател Володимир Зеленски и на европските лидери дека целта на претстојниот состанок со рускиот претседател Владимир Путин е да се постигне прекин на огнот и да се процени можноста за мировен договор.
Состанокот Трамп–Путин е закажан за 15 август на Алјаска. За време на разговорите на 13 август, Трамп кажал дека сака да се договорат за прекин на огнот и да се утврди дали има реална шанса за мировен договор во конфликтот меѓу Русија и Украина. Зеленски, пак, нагласил дека не може да му се верува на Путин.
Според извори, Трамп сметал дека мировниот договор би можел да вклучува размена на територии, но оставил на Зеленски и Путин да разговараат за деталите. Францускиот претседател Емануел Макрон и германскиот канцелар Фридрих Мерц истакнале дека територијалните прашања не треба да се договараат без согласност на Украина.
Мерц нагласил дека Украина е подготвена да разговара за територијални прашања, но како полазна точка ќе ја земе линијата на фронтот, додека „правно признавање на окупираните територии не е тема на преговори“. Зеленски рекол дека Трамп ќе остане во контакт и по состанокот на Алјаска.
