Грчките власти разгледуваат низа правни и практични мерки како одговор на можен нов турски закон поврзан со доктрината „Плава татковина“, која се поврзува со зацврстување на турските претензии во Егејското Море, пренесуваат грчките медиуми.
Според информации од Атина, во игра се неколку опции, меѓу кои и прогласување на заштитени морски паркови во Егејот, што би можело дополнително да ги ограничи турските барања во спорните области.
Грчкиот министер за надворешни работи Јоргос Герапетритис повеќепати изјави дека, доколку дојде до ескалација од турска страна, Грција располага со правни инструменти за одговор и ќе ги искористи, пренесува „Катимерини“.
Една од разгледуваните мерки е создавање нови морски заштитени зони низ Егејското Море, вклучувајќи и чувствителни екосистеми и мали острови во источниот дел на морето.
Во јули 2025 година, Грција веќе прогласи два морски парка – еден во Јонското Море и еден во јужните Киклади. Во случајот со Кикладите, заштитата опфати и мали островчиња, што предизвика негативна реакција од Анкара, која смета дека тие немаат значајни поморски права.
Грчките власти нагласуваат дека засега станува збор за теоретски сценарија и дека конечниот одговор ќе зависи од идните потези на Турција.
Во меѓувреме, извештаите за можен нов турски закон кој се поврзува со доктрината „Плава татковина“ дополнително ги зголемија тензиите меѓу двете земји, иако официјални детали од Анкара сè уште не се објавени.
Доктрината „Плава татковина“ во Грција се толкува како експанзивна поморска стратегија која ги опфаќа турските претензии во Егејското, Средоземното и Црното Море, што долгорочно ја одржува напнатоста во односите меѓу двете држави.
