Израел денес ги засили воздушните напади врз јужен Либан, при што загина најмалку една личност. Нападите, според израелските власти, се насочени кон спречување на повторното воено зајакнување на Хезболах по минатогодишната војна.
Хезболах, од своја страна, тврди дека ги почитува договорите за прекин на огнот и ги повлекол своите сили северно од реката Литани, каде контролата треба да ја преземат либанската армија и УН силите (УНИФИЛ). Сепак, спроведувањето на договорот е отежнато поради израелските операции и внатрешната политичка нестабилност во Либан.
Денес Израел издаде предупредување за четири јужни села – Деир Кифа, Шехур, Аината и Таир Филсаи – и соопшти дека ги напаѓа објектите на Хезболах. Либанското министерство за здравство потврди дека при претходен напад врз селото Ал-Тири загинала една личност.
Израелската војска тврди дека уби член на Хезболах задолжен за „обнова на воената подготвеност“. Во вторникот Израел изведе еден од најсмртоносните напади од минатогодишниот конфликт, при што загинаа 13 лица во палестински бегалски камп кај Сидон. Израел соопшти дека нападнал објект што го користи Хамас, додека Хамас ги негираше воените структури во камповите.
