Нови тврдења за смртта на американскиот финансиски моќник и осуден сексуален престапник Џефри Епстин повторно го привлекоа вниманието на светската јавност, седум години откако беше пронајден мртов во затвор во Њујорк.
Форензичкиот експерт Мајкл Фримен тврди дека Епстин не извршил самоубиство, туку бил убиен со давење, најверојатно одзади.
Во интервју за Би-Би-Си, Фримен изјавил дека неговиот заклучок се темели на анализа на медицинската документација и фотографиите од обдукцијата, кои му ги доставил Марк Епстин, братот на починатиот.
Според експертот, одредени повреди не се совпаѓаат со официјалното објаснување за смртта.
Тој посочува на длабоко крвавење во левото рамо, повреди на лицето и траги на вратот кои, според неговата анализа, би можеле да укажуваат на физички напад и давење.
„Повредите не се совпаѓаат со начинот на кој е пронајдено телото. Останува само едно објаснување, а тоа е убиство“, изјавил Фримен.
Тој смета дека Епстин можеби бил задавен со предмет кој потоа бил искористен за неговото тело да биде обесено на креветот во затворската ќелија.
Сепак, експертот признава дека не знае кој би можел да стои зад евентуалното убиство. Неговата анализа сè уште не поминала независна научна рецензија.
Официјалниот заклучок на американските власти останува непроменет – Џефри Епстин извршил самоубиство со бесење на 10 август 2019 година.
Тогашната главна медицинска истражителка Барбара Семпсон претходно изјави дека цврсто стои зад официјалната проценка.
Епстин беше пронајден мртов додека во затворот чекаше судење по обвиненија за трговија со малолетници за сексуална експлоатација.
Новата форензичка анализа повторно отвори прашања за околностите на неговата смрт, но засега не претставува официјална потврда дека станува збор за убиство.







