Повеќе од една деценија по тешката несреќа на скијање, здравствената состојба на легендарниот Михаел Шумахер и понатаму останува далеку од очите на јавноста. Сепак, нови медиумски информации откриваат интересни детали за методите користени во неговата рехабилитација.
Според пишувањата на хрватскиот портал „Гол“, седумкратниот светски шампион во Формула 1 бил возен во спортски автомобил „Мерцедес АМГ“, со цел познатиот звук на моќниот мотор да поттикне мозочна активност.
Со оглед на тоа што Шумахер поминал повеќе од две децении во автомобилските трки, идејата била звуците што го придружувале во текот на неговата кариера да се искористат како дел од сензорната стимулација.
Според објавените информации, за легендарниот возач деноноќно се грижи тим од 15 медицински и помошни лица, меѓу кои лекари, масери и асистенти.
Сепак, не се објавени медицински податоци што би потврдиле дали ваквиот пристап довел до подобрување на неговата здравствена состојба.
Шумахер доживеа тешка несреќа на 29 декември 2013 година, додека скијаше во француските Алпи.
При падот удрил со главата во карпа и покрај тоа што носел заштитна кацига, претрпел сериозни повреди на главата.
Веднаш бил пренесен во болница во Гренобл, каде што бил опериран и ставен во медицински индуцирана кома.
Оттогаш, неговото семејство строго ја чува приватноста на поранешниот шампион, а официјалните информации за неговото закрепнување се исклучително ограничени.
Михаел Шумахер останува една од најголемите легенди во историјата на Формула 1, со седум светски шампионски титули, додека неговата актуелна здравствена состојба не е јавно потврдена.








