Иранскиот претседател Масуд Пезешкијан донел одлука за повторно воспоставување на пристапот до меѓународниот интернет, потврдија државните медиуми во земјата преку Министерството за комуникации.
Оваа одлука доаѓа по речиси три месеци ограничен пристап, во текот на кои поголем дел од населението во Иран беше без можност за поврзување со глобалната мрежа. Според податоци од организацијата NetBlocks, блокадата траела околу 87 дена, а само мал број корисници успевале да пристапат преку скапи VPN сервиси.
Интернет-ограничувањата биле воведени во период на зголемени безбедносни тензии и воени активности, кога властите се обидувале да го контролираат протокот на информации и комуникации во земјата. Ова не е првпат Иран да применува вакви мерки, бидејќи слични исклучувања биле забележани и за време на претходни протести и политички немири.
Со новата одлука, интернетот повторно станува достапен, но засега не е јасно дали и кога целосно ќе се нормализира пристапот без ограничувања. Властите не дадоа дополнителни детали околу идните чекори.
