Рускиот истражен комитет тврди дека Микола Џаман, командант на 138-та бригада за воздушна одбрана на украинската армија, издал директна наредба за соборување на авионот Ил-76, кој во 2024 година пренесувал украински заробеници.
Според објавата на државната руска агенција ТАСС, истрагата утврдила дека авионот бил соборен со ракета од американскиот систем „Патриот“, кој, како што наведуваат, се наоѓа во опремата токму на бригадата што ја предводи Џаман.
Како резултат на истрагата, Џаман е ставен на меѓународна потерница, а против него е поднесено обвинение за терористички акт. Рускиот Истражен комитет соопшти дека работи и на идентификација на останатите соучесници, вклучително и високи функционери од украинското Министерство за одбрана.
Овој случај предизвика огромна меѓународна реакција кога се случи – авионот Ил-76 се урна додека, наводно, пренесувал украински воени затвореници што требало да бидат разменети. Украина првично негираше одговорност, додека Русија тврди дека имала докази уште тогаш за вмешаност на украинската страна.
Информациите доаѓаат во време на засилена дипломатска и воена тензија меѓу двете земји, а овој потег од Москва веројатно ќе предизвика нова рунда обвинувања и политички пресметки.
