Рускиот поручник Лев Ступников (26) шест месеци тајно соработувал со украинската војска, доставувајќи информации за позициите, плановите и комуникациите на сопствените единици.
Според реконструкцијата на американскиот весник „Волстрит журнал“, неговите информации помогнале во украински напади во кои наводно загинале повеќе од 300 руски војници, меѓу кои и командантот на неговата бригада.
Ступников бил испратен на фронтот кон крајот на 2023 година, а во февруари 2024 година воспоставил контакт со украинската страна преку блогерот Дмитро Карпенко.
Еден од најтешките напади се случил во близина на Волноваха, каде што Ступников наводно доставил координати на воен полигон.
Украинските сили извршиле напад со ракетниот систем ХИМАРС, при што, според објавените информации, загинале 68 руски војници, а 60 биле ранети.
Меѓу загинатите бил и командантот на бригадата, полковникот Гусеин Мусаев.
Ступников го преживеал нападот бидејќи непосредно претходно се оддалечил од собраните војници.
Во јули 2024 година решил да пребега на украинска територија, а во преминувањето на фронтовската линија му помогнал украински дрон.
Подоцна се приклучил на Рускиот доброволечки корпус, составен од руски државјани кои се борат на украинската страна.
Неговата мајка и помладата сестра успеале да ја напуштат Русија, но сопругата Лиза одбила да му се придружи.
„Никогаш нема да ги напуштам своите родители и својата земја“, изјавила таа за руската телевизија РТ.
Приказната предизвикала силни реакции и кај семејствата на загинатите војници.
Додека „Волстрит журнал“ наведува повеќе од 300 загинати во напади поврзани со информациите на Ступников, руската РТ објавува бројка поголема од 200, а точниот број не е независно потврден.
