Во срцето на Париз е пријавена невообичаена кражба во која непознат сторител успеал да украде сребрена фигура на Исус Христос поставена на дрвен крст во познатата црква Сен Жермен де Пре. Инцидентот се случил во саботата околу 16 часот, а информацијата ја потврдија француските медиуми и локални претставници.
Според првичните податоци, крадецот делувал брзо и без употреба на насилство. Во моментот на кражбата во храмот не се одржувала богослужба, што му овозможило непречен пристап до предметот. Сè укажува дека сторителот не бил редовен посетител на црквата, што дополнително ја зголемува мистеријата околу мотивите и начинот на кој ја извршил кражбата.
Локалните власти и црковните претставници изразија загриженост, посочувајќи дека ваквите предмети не се само материјална, туку и културна и религиозна вредност, дел од наследството на храмот.
Инцидентот доаѓа во период кога француските цркви и капели се соочуваат со зголемен број кражби на литургиски предмети. Според податоци од 2024 година, бројот на пријавени случаи пораснал за 22 отсто, со повеќе од 800 регистрирани инциденти низ целата земја.
Сен Жермен де Пре, една од најстарите и најпознатите цркви во Париз, сега е во фокусот на истрагата, додека полицијата работи на утврдување на идентитетот на сторителот и лоцирање на украдениот предмет.
